Wpurnaw

Diri katalikung gandrung
Galindeng lelembutan saukur jadi panglipur
Nalika teuteup teu bisa ngabeberah manah nu marudah
Teu kawas keur deukeut
Salempay kadeudeuh sok disolendangkeun dina beuheung
Atanapi ditiungkeun ka salira nalika hujan miripis alit
Kiwari, ngan kaduga nganteurkeun deudeuh liwat runtuyan aksara jeung rumpaka du'a
Kasono teh ngan sawates jempol leungeun ngeserkeun potret ka potret

Indung!

Duh indung
Rumasa putra sok pangaingna
Nyarios nyoroscos siga nu nyarioskeun pangaos
Padahal indung nu dipayun
Nu payus kenging papayung ti putra nu kantos di kandung
Duh indung
Nu ngaraksa ngageuing putra
Sanaos putra tos capetang nyarioskeun dunja
Anjeun teu weuleh rumahuh nalika putra pendak sareng bangbaluh
Nu sok melang nalika putra teu mulang
Nu dipikageuleuh nalika putra mendak kageuleuh
Nya indung
Nu teu kendat ngadu'a
Asihna deudeuhna teu kedah dimang-mangan deui

Ok

Toroktok cuanki

Duh... Tukang cuanki pangdugikeun ieu sono ngalangkungan toroktokna sora kokol nu ditakol, mugia janten wirahma tresna nu anger ngagalindeng nalika salempay kasimpe nyimbutan manehna.
Tukang cuanki... Lamun pareng ngalangkung ka buruan hatena, harewoskeun ieu talatah, yen diri lir kuah nu leungiteun samara, tiis lir cuanki teu ngangge saledri.
Sanaos diri mah abot nananggung rancatan katineng, nanging moal bade baha pikeun tumerus kokotetengan nakolan mangkok waktos.
Aminkeun tukang cuanki... Pamugi terengtengna asih kuring dumugi ka lebah lahunan sanubari manehna.

In memoriam Kembang Manah

Bray beurang
Ngudar lamunan lawas kapapanjangan
Angin ngahiliwir
Ngusap hate nu angar kahalodoan
Basa panon bolotot neuteup langit
Imut anjeun kumalangkang diantawis mega-mega
Imut nu harita jadi ubar kalungse
Imut nu baheula jadi palipur katugenah
Imut nu kiwari taya dikieuna, imut nu kudu mulang deui ka sarakan asihNa pangeran
Imut anjeun indit, dijajap ku manglaksa doa
Ninggalkeun seungit kembang-kembang panineungan
Diluhureun taneuh beureum
Kuring teger nanangkeup tetengger
Dibarung keprulna cai kacinta
Pileuleuyan nung!
Anjeun teu leungit
Salawasna anjeun aya dina getih, dina hate, dina doa, nu salawasna ngocor jadi panineungan kuring jeung anjeun.